वसमत (जि. हिंगोली) / नांदेड: गेल्या दोन महिन्यांच्या शांततेनंतर हिंगोली आणि नांदेड जिल्ह्याला पुन्हा एकदा भूकंपाच्या जोरदार धक्क्यांनी हादरवून सोडले आहे. शनिवारी (३ ऑक्टोबर २०२६) सकाळी ७ वाजून ४७ मिनिटांनी ३.३ रिश्टर स्केल क्षमतेच्या भूकंपाची अधिकृत नोंद झाली. राष्ट्रीय भूकंप विज्ञान केंद्राच्या माहितीनुसार, हिंगोली जिल्ह्यातील औंढा नागनाथ तालुक्यातील गढाळा हे या भूकंपाचे मुख्य केंद्रबिंदू () असल्याचे समोर आले आहे. धक्कादायक बाब म्हणजे, या पहिल्या धक्क्यानंतर सकाळी १० वाजेपर्यंत अवघ्या सव्वादोन तासांत हिंगोली परिसराला सलग चार धक्के बसले, तर शेजारील नांदेड जिल्ह्यातही जमिनीला तीव्र कंप जाणवल्याने नागरिकांमध्ये प्रचंड दहशत निर्माण झाली आहे.

४८ तासांत दुसर्‍यांदा हादरा; जमिनीतून भीषण आवाज

यापूर्वी १ ऑक्टोबर रोजी गुरुवारी रात्री ९:४१ वाजेच्या सुमारास वसमत तालुक्यातील पांगरा शिंदे परिसरात भूगर्भातून गूढ आवाजासह जमिनीला धक्का बसला होता; मात्र सिस्मोग्राफवर त्याची अधिकृत नोंद झाली नव्हती. त्यानंतर ४८ तासांच्या आतच शनिवारी सकाळी संपूर्ण जिल्ह्याला ३.३ रिश्टर स्केलचा मोठा हादरा बसला. भूकंप होताना जमिनीच्या पोटातून भीषण गडगडाट व खडखडाटाचा आवाज आला. आवाजासोबतच घरे, भांडी आणि लाकडी साहित्य थरथरल्याने नागरिकांनी घाबरून तातडीने लहान मुले व वृद्धांसह घराबाहेर मोकळ्या मैदानात धाव घेतली.

सकाळी ७:४७ ते १०:०० वाजेदरम्यान सलग चार धक्के

हिंगोली आणि वसमत परिसराला बसलेल्या धक्क्यांची मालिका सकाळी सुरूच राहिली:

पहिला धक्का: सकाळी ७:४७ वाजता (३.३ रिश्टर स्केल, केंद्रबिंदू: गढाळा, ता. औंढा).

दुसरा धक्का: सकाळी ९:४३ वाजता (मोठ्या तीव्रतेचा हादरा).

तिसरा धक्का: सकाळी ९:५१ वाजता (मध्यम कंप).

चौथा धक्का: सकाळी १०:०० वाजता (सौम्य धक्का).

एकापाठोपाठ एक बसलेल्या या चार धक्क्यांमुळे जुलै महिन्यातील आठवणी ताज्या झाल्या आहेत. सतत होणारे हे सूक्ष्म भूकंप भविष्यात एखाद्या मोठ्या प्रलयंकारी भूकंपाची नांदी तर नाही ना, अशी तीव्र चिंता आता परिसरातील नागरिकांना सतावत आहे.

नांदेड जिल्ह्यातही सकाळी ९:४३ वाजता तीव्र हादरा

हिंगोलीतील या भूगर्भीय हालचालींचे तीव्र पडसाद लगतच्या नांदेड जिल्ह्यातही उमटले. शनिवारी सकाळी बरोबर ९ वाजून ४३ मिनिटांनी नांदेड शहर आणि ग्रामीण भागात भूकंपाचा तीव्र हादरा बसला. जमीन थरथरल्याचे जाणवताच अनेक भागांतील नागरिक घराबाहेर आणि सुरक्षित मोकळ्या जागेत पळाले. आपत्कालीन यंत्रणांकडून मिळालेल्या प्राथमिक माहितीनुसार कुठेही वित्तहानी किंवा जीवितहानी झाल्याचे वृत्त नाही; मात्र नागरिकांमध्ये प्रचंड भीतीचे वातावरण निर्माण झाले होते.

नागरिकांनी घाबरू नये, प्रशासनाचे सतर्कतेचे आवाहन 

उपविभागीय अधिकार्‍यांचे आवाहन: ङ्गङ्घगुरुवारी रात्री जाणवलेल्या धक्क्याची तांत्रिक नोंद झाली नव्हती; मात्र शनिवारी सकाळी ७:४७ च्या सुमारास बसलेल्या धक्क्याची ३.३ रिश्टर स्केल इतकी नोंद झाली आहे. भूकंपाची तीव्रता कमी स्वरूपाची असल्याने नागरिकांनी अजिबात घाबरून जाऊ नये. केवळ खबरदारी म्हणून सर्वांनी आवश्यक सतर्कता बाळगावी आणि कोणत्याही अफवांवर विश्वास ठेवू नये.ङ्घङ्घ

- विकास माने, उपविभागीय अधिकारी, वसमत.

आपत्ती व्यवस्थापन यंत्रणा सज्ज: हिंगोली आणि नांदेड जिल्हा प्रशासनाने सर्व महसूल व पोलीस यंत्रणेला सतर्क राहण्याचे निर्देश दिले असून, आपत्कालीन नियंत्रण कक्ष २४ तास परिस्थितीवर लक्ष ठेवून आहे.